Дар шашмоҳаи аввали имсол дар муассисаҳои тандурустии мамлакат 62 навгонӣ, аз ҷумла 27 адад дар самти ташхис ва 35 адад дар самти табобат ворид карда шуд, иттилоъ дод Вазири тандурустӣ ва ҳифзи иҷтимоии аҳолии мамлакат Ҷамолиддин Абдуллозода имрӯз зимни нишасти матбуотии ин ниҳод.

Ба иттилои Ҷамолиддин Абдуллозода, навгониҳои  ба самти ташхис воридшуда бемориҳои саратон, меъдаю рӯда, пайвандсозии узвҳо, бемории дилу рагҳо, бемориҳои пӯст ва дар самти табобат ҷарроҳиҳои дилу рагҳо, сутунмӯҳра, пайвандсозии узвҳои инсон, бемориҳои меъдаю рӯда ва саратон, ҷарроҳиҳои қафаси сина, абдоминалӣ, рентгенэндоваскулярӣ ва чашмро дар бар мегиранд.

Ҳамчунин иброз гардид, ки дар шашмоҳаи аввал дар 139 нафар  амалиёти ҷарроҳии пайвандсозии узвҳо (2023-124) гузаронида шуд, ки нисбат ба ҳамин давраи соли 2023  15 адад зиёд мебошад.

Дар нишаст иттилоъ дода шуд, ки дар маҷмуъ дар давраи ҳисоботӣ  1009 амалиёти ҷарроҳӣ дар дилу рагҳо (327 адад дар дил, 682 адад дар рагҳо) гузаронида шуд, ки нисбат ба ҳамин давраи соли 2023 74 адад камтар мебошад. Миқдори амалиёти гузаронидаи ангиография, ангиопластика ва стентгузорӣ мутаносибан 1254 ва 656- ададиро ташкил медиҳад, ки нисбат ба ҳамин давраи соли 2023   74 ва 340-ададӣ камтар мебошад.