Вазъи кунунии фаъолияти соҳибкорӣ дар мамлакат зимни вохӯрии Раиси Кумитаи давлатии сармоягузорӣ ва идораи амволи давлатии Ҷумҳурии Тоҷикистон Султон Раҳимзода бо соҳибкорони ватанӣ баррасӣ гардид.
АМИТ «Ховар» бо истинод ба Кумитаи давлатии сармоягузорӣ ва идораи амволи давлатии ҷумҳурӣ иттилоъ медиҳад, ки ҳадафи вохӯрӣ баррасии нақшаҳои кумита дар самти ҷалби сармоя вар рушди соҳибкорӣ дар мамлакат буд.
Дар вохӯрӣ масъалаҳои марбут ба мушкилиҳои соҳибкорон дар самти фаъолияти онҳо, низоми фаъолияти ассотсиатсияҳо бо ширкатҳои ватанӣ, фаъолияти соҳибкорӣ ва ҷалби сармоя тавассути беҳтар намудани фазои соҳибкориву сармоягузорӣ ва дигар масъалаҳо муҳокима гардиданд.
Аз ҷониби раиси кумита баҳри беҳтар намудани фаъолияти соҳибкорон пешниҳодҳои зарурӣ дар самти таҳияи бизнес -нақшаҳо, рақамикунонии фаъолияти ширкатҳои ватанӣ ва густариши ҳамкорӣ байни кумита ва соҳибкорони ватанӣ манзур гардид.
