Ширкати «Shanghai SUS Environment»-и Ҷумҳурии Мардумии Чин нақша дорад, ки дар вилояти Хатлони Ҷумҳурии Тоҷикистон аз партовҳои сахти коммуналӣ барқ истеҳсол намояд.
19 ноябр зимни вохӯрии Раиси вилояти Хатлон Давлаталӣ Саид ва ҳайати намояндагони ширкати «Shanghai SUS Environment»-и Ҷумҳурии Мардумии Чин таҳияи лоиҳаҳои сӯзонидани партовҳои сахти коммуналӣ барои истеҳсоли барқ мавриди баррасӣ қарор гирифт.
Татбиқи ин лоиҳа на танҳо неруи барқи устувор ва тозаро таъмин, балки ба таъсиси ҷойи кор, омӯзиш ва рушди иҷтимоӣ дар минтақа низ мусоидат менамояд.
Ширкати «Shanghai SUS Environment»-и Ҷумҳурии Мардумии Чин соли 2008 таъсис ёфта, ба таъминкунандаи пешбари глобалии ҳалли экологӣ, бахусус дар соҳаи партов ба энергия (WtE) табдил ёфтааст. Он бузургтарин истеҳсолкунандаи оташдон дар ҷаҳон ва дуюмин сармоягузор дар лоиҳаҳои WtE дар ҷаҳон аст. Неругоҳҳои WtE партовҳои сахти коммуналиро ба неруи барқ ҳамчун манбаи устувори энергияи «сабз» табдил медиҳанд.
АМИТ «Ховар»
